又係一年一度， 去塘福宿營同摸蜆， 今年打算從陸路去,即係搭車去東涌再搭巴士入塘福。。。。
我哋約咗十一點鐘去到東涌東薈城聯邦飲茶， 但有人遲到， 遲到成 45分鐘 😡， 等埋佢食完嘢都差唔多一點先出發~
去東薈城間超市， 買燒烤食品。。。
間超市， 真係選擇唔多， 好在有個 街坊知道我哋想買燒烤食品， 佢哋叫我哋去街市買， 街市有兩間專賣燒烤食品， 但好食又抵嗰間好似今日休息，
唔緊要啦我哋照去睇睇，
果然選擇好多， 下次過嚟呢度買~
之後就搭巴士入去塘福啦~
今次一樣係去信和 book渡假屋， 塘福渡假屋越來越少， 今次book咗兩房一廳 住三樓， 800蚊一晚。
我哋去到時， 個業主話唔知道今日有人嚟， 所以匆匆忙咁叫個 美女 同我哋一齊上去， 幫我哋換床鋪， 後來發覺個電視 有問題， 通知個業主幫我哋 修理一下，
每間房 有兩張床， 其中一間房 有一張雙人床
所以五個人住都得~
個廁所同沖涼房就比較差啲
個單位真係比較舊啲， 因為係三樓所以有個小露台
因為過幾日就中秋節，棗棗 買咗幾個燈籠過嚟😊
因為落雨， 驚夜晚會繼續 落， 所以上天台睇吓環境， 都唔明點解年年過嚟都會落雨，
因為天台冇遮冇擋， 如果落雨點算😵 業主話可以落地下燒野食，樓下有個帳篷。。。
希望今晚好天啦 ， 因為住三樓， 落地下燒嘢食係好鬼麻煩
我哋首先去士多買啲飲品,燒烤叉同炭 上去先
之後 我哋成四點先至出去摸蜆，
去到巴士站見到有幾隻牛， 佢哋見到我即刻走。。。
等咗一陣就有巴士到， 其實我哋四個搭的士仲平過搭巴士， 不過的士仲少過巴士。。。
去到水口村我哋去 租摸蜆工具啦
我以為今年冇乜人摸蜆， 但出到去海灘都仲有好多人
我一摸就捉到隻蝦仔， 蝦仔 太細掉返出去
又摸到隻唔知咩囉。。。
摸蜆摸咗半個鐘， 好快就 潮漲， 但我哋堅持😒
結果我到差不多六點， 但我成條短褲已經濕曬😱
今年摸得比 去年少， 但有幾粒係非常之大
之後交還工具， 就搭巴士返去
返到去換過衫， 睇咗一陣電視， 大家就準備燒嘢食啦
我哋堅持買少少海鮮。。
啲蝦雖然係雪藏， 但肉質一樣彈牙
掛上燈籠， 但唔覺有中秋節氣氛
嗰幾個人 起爐 起到好耐先著火🙀
我就喺廚房負責包起啲要用錫紙包嘅食物
食到最後就 燒蜆, d 蜆真係好鮮甜~😋
好可惜唔夠炭用， 次次買一包都唔夠 用， 而家 d炭質素好差，好快就燒哂。。。
食飽我哋就執拾好啲垃圾， 落返去沖涼睇電視
沒有留言:
張貼留言