辛苦

最近公司盛傳做埋今年會結業,到時會調我地去集團其他公司做……
所以有好多同事陸續辭職…..
走呀~走呀~只有人走,但唔會請人,未來日子真係唔知點過…..
我諗工作量加大不止,可能例假都冇得放

年中花紅

公司已經公佈了今年業績,今年係有花紅,出得唔錯,會係月底同薪金一齊出…..
不過今年要凍薪,冇人工加,

雖然一早有心理準備冇人工加,但係睇見封信咁寫,個心忽然覺得好寒涼

黑先生 >< 你好恐怖 !!!

颱風黑格比來去沖沖,來得快,走得仲快……
琴日返工都唔使開遮,點知行到公司附近條馬路,見到有玻璃碎,越近公司,d玻璃碎越多,
行到公司樓下簡直嚇死人,成大堆玻璃碎…….上面重好似有玻璃跌落嚟,
入到公司,…..哇!個窗好似中咗彈咁

變態

越來越覺得我而家間公司制度衰,做野越來越唔合理同辛苦…

d同事我覺得佢地越來越自私,令我越來越憎里度….
今日有件事發生,令到我真係好嬲好嬲,但係我叫自己唔好發脾氣忍,忍,忍,忍,忍,忍…….
我諗我成日忍住唔發脾氣,遲早心理變態,
有時我諗心理質素會影響一個人,因為最近我覺得好累,瞓極都唔夠,真係好累呀

打風

呀~~唔好打風呀!!!!
又話會掛八號風球,我好命苦呀,次次放完假都打風

打風要返工好慘呀

新同事

最近公司嚟咗個十八歲ga小妹妹新同事,佢成日都可以為小事而哈哈笑,我有個同事話佢好天真,遲早係走廊一路行一路跳

前兩日佢同我講而家興養寄居蟹,我聽咗之後,心諗”里d都有得養”,

之後我咪問佢養大之後係咪煮嚟食,佢聽咗之後高八度話寄居蟹唔會大„重話我傻傻地

琴日被我見到隻好細好細ga曱由係在玻璃杯度,我將個玻璃杯反轉,困住隻曱由,然後叫個小妹妹嚟睇,重叫佢攞返屋企養,點知佢係度笑話唔制,隻曱由會大話,又話我傻傻地

今日佢見我攞住個玻璃杯,竟然話我去捉曱由,

真係唔知佢傻定我傻

漏水

琴日落雨落足一日,重要係黑雨,因為要返工,所以淋到成隻狗咁.

最樣衰係,公司周圍漏水,要用垃圾桶剩水,天花頂起哂;

我望住滴落嚟水,我覺得好搞笑,因為唔夠垃圾桶,所以連冰桶都用埋

大堂勁漏水,工程部忙到要死,重被老細鬧到成面屁

大老細集團起d樓,要買真係要諗清楚

凍完未

嘩!好凍呀,究竟凍完未呀!?

今日返早,五點幾要出門口,天氣凍到不得了,諗住上到巴士可以避寒,點知巴士上面一樣咁凍,尤其對腳簡直唔係自己;

落咗車,凍到不得了,總之一路行一路震

豬扒大放送

最近飯堂好似癲癲哋,好似今日咁,早餐豬扒飽,午餐洋蔥豬扒,晚餐加厘豬扒,有啲要OT嘅同事就係度呱呱嘈.

哈哈,唔知消夜係咪豬扒麪?

叉燒

琴日有個同事係飯堂睇見個廚房老斬叉燒,啲叉燒跌晒落地,但佢若無其事咁拾起繼續斬,我同事看見就說:”唔喺咁都俾人食”,個廚房只係陰陰咀咁笑…..点知今日真係叉燒炒蛋,~~~~~~唉!唔怪得之我成日肚痛咯.

但係我有個男同事就唔理咁多照攞嚟食;唔知就話啫,知就梗係唔食啦,寧願食少一樣餸,但係佢話佢都係一隻細菌,而且里啲又唔係便便,啲叉燒又冇便味;這時我就唸起好耐之前嘅一個低能問題:就問佢”你寧願食屎味薯片,定係薯片味嘅屎”佢答我”梗係屎味薯片”,…..吓!我就兩樣都唔食咯,真係佩服佩服!