韓國秋天七天之旅第二天

因為貪心,要去三個地方,如果自己去,會驚唔夠時間去,所以上網join kk day 一日團

 題外話 ， 今次去韓國 我去鴨記 買咗呢張卡80蚊， 呢張卡超級好用， 因為係8日卡， 所以今次返到嚟香港 都可以用多一日

張卡 好多亞洲地方都可以用。。。。

講返韓國 第二日， 因為約咗要7點50分喺明洞 地鐵站外集合， 所以我哋一早 過去isaac買三文治食, 間店因為會超級多人排隊, 所以我哋好早過咗去排隊,我今次唔記得影 issac

我哋買咗三文治, 搵個地方坐低食, 然後等kk day 導遊 出現

原來有好多唔同ga團, 好多人喺度等緊佢哋嘅出現, 佢哋會講普通話或者英文.....

我哋搵到我哋嗰 導遊, 然後跟住 佢 上車。。。

 

開頭我都以為唔係太多人， 但原來都有咁多人去， 所以我哋個架都係大車。。
之後去東大門 接埋其他人， 我哋就正式出發。

非常期待去睇紅葉， 坐車途中見到路邊都好多紅色嘅樹葉

第一站係去晨靜樹木園， 係我想去嘅地方， 係網上見到佢嘅風景， 非常之靚， 但網上話入面好細。。。

入到去 真係好靚， 但我覺得一啲都唔細。。。

導遊首先用英文介紹 園入面嘅點樣行 ， 邊度最值得 影相， 因為有其他團友唔識英文， 所以導遊再用普通話講一次， 之後再約好時間，幾多點喺邊度等再上車

雖然冇想像中咁多楓葉， 但我都覺得好開心， 我真係第一次睇咁多楓葉， 真係好開心~

除咗 楓葉， 都有其他花花草草， 啲園藝種得好靚

到咗冬天， 呢度會開埋夜晚， 夜晚會有好靚嘅燈飾， 可惜要12月先開始， 但12月太凍喇， 我應該唔會去啲咁凍嘅地方

喺入面， 我哋影咗好多相， 同埋真係覺得唔夠時間用， 下次有機會， 一定自己再嚟。

差不多夠鐘， 我哋行返出去， 見到出面有啲賣小食嘅， 不過我哋冇買嚟食， 因為對我嚟講 吸引唔大~

我哋上咗車， 就去南怡島啦。。。
跟團雖然限時間， 但就超級方便。。。
去到碼頭， 因為團費包埋船飛， 所以導遊就喺度派埋船飛。

船飛連 南怡島小冊子， 之後導遊又喺度講解， 又講好幾多點喺呢度邊集合

之後 就各自各上船去南怡島啦， 其實同自由行差不多

坐船到咗南怡島， 前面有有兩個雪人。。。

南怡島相對就冇晨靜樹木園咁靚， 好多紅葉都冇曬啦

幸好仲有少少喺度， 以我
影相技術，都可以影到好似好多咁

有人話南怡島有好多 銀杏樹， 但當日我哋去到時有好多已經落葉， 所剩無多。。。

地上嘅枯葉黃黃紅紅好靚。。。。

到中午就越多人， 雖然少咗大陸人去韓國， 但仍然見到有好多大陸人係南怡島出現。。。

到咗中午我哋食中午餐， 去一間叫戀歌之家  。。。

可能係平日食飯嘅人唔多。。。

叫咗兩個 搖搖(shake shake )便當，一個泡菜薄餅，
因為個鐵飯盒好熱，所以要一對手套。。。

未搖之前係咁嘅。。。

戴住手套,將個飯盒搖呀搖,裏面嘅飯同雞蛋就會搖勻曬。

食飽飽我哋就嚟開個飯店。

飯店前面，有個小火車路軌種滿楓葉真係幾靚

經過一個大嘅杉樹林

去碼頭途中，見到有雪糕賣，我哋就買咗雙色雪糕， 作為飯後甜品

途中見到冬日戀曲 嘅相， 原本等影相但啲大媽好冇禮貌 好唔守秩序， 真係有啲嬲， 好難先至 攝 到入去影一張相

喺南怡島有個找換店， 匯率當然好唔抵呀。。入面都有郵票賣,我買咗兩個~
去返碼頭搭船返出去

船上面 面好多國旗， 當然搵返之香港 旗 影番一張。。。

搭船途中 ，見到有人玩 鋼索 去南怡島。。

沿岸都有好多楓樹變紅~

返到去渡口附近， 見到有隻貓， 感覺隻貓唔驚人， 同佢玩咗一陣，

見 到有間買南怡島手信嘅精品店， 入面有南怡島 精品， 明信片等等嘅 南怡島 手信買， 我買咗張明信片 貼上郵票 ， 門口有個郵筒 我將明信片投入 寄返 香港。。。

門口有堆假嘅小雪人，，

之後去便利店買啲嘢飲， 我哋就上車去小法國村， 去到小法國村已經係下午好晏。。。

小王子， 但好大隻好高

入到去， d屋色彩繽紛 好靚,

好多人話小法國村好細冇咩睇, 但我哋覺得好多影相位, 

原來小法國村都可以吸印仔,..

其實每間屋入面, 入面都有啲擺設可以畀有人影相

到咗,黃昏我哋都要走啦, 雖然細,但係我哋都影唔唒啲相, 有機會留待下次再嚟過....

總結今次跟kk day 1日遊, 真係唔錯,包埋入場券, 有埋車 送你去到目的地,  啱哂我呢啲唔想咁早起身嘅大懶人.....

佢哋送番我哋去到明洞, 同工作人員道別, 我哋返酒店hea一陣, 之後行返出明洞食晚餐今晚去食豬小姐, 因為唔係好知道佢係邊, 所以攞住地圖同電話周圍搵, 咁啱遇到派傳單嘅男人, 佢派傳單叫我去佢嗰間食店食嘢， 我話唔使 ，佢見到我攞住張地圖搵路, 問我想去邊, 我指住豬小姐嘅韓文, 佢好好人咁帶我哋去豬小姐，自從上次大阪之旅(詳情睇糊塗大阪之旅)， 我問派傳單ga人有啲戒心， 因為上次係日本問派傳單個男人,去我地想去果間食店喺邊， 佢好冇禮貌咁瞄一瞄我,之後擰轉頭唔理我。。。 (因為以前去日本,覺得日本人好好,好有禮貌)， 

去豬小姐當然食豬腳

我哋只係叫咗 一分蒜蓉豬腳， 

送咗一煲泡菜湯連麪， 同埋一份沙律

味道都唔錯食得我哋好飽

食飽後, 出番明洞大街 見到LINE FRIENDS STORE 棗棗話想同 line brown 影相,

門口有好多氣球

😆😆😆😆😆😆😆😆😆😆

                                           後記:

                                  南怡島買的明信片

                    返到嚟香港差不多一個星期先收到