澳門主教山之旅2016~Day 2

到了第二日，因為附近冇經濟又好食的食店，所以我地去咗金沙城的美食廣場。。。

都知道會貴過出面，味道都唔會好食，不過唔想行太遠搵食，近近地食少少早餐都好~

行咗幾圈，最後揀咗里幾樣食物，小籠包，肉包，饅頭。。
味道比想像中好~

食飽後，返酒店休息吓，執好行李，十一點幾離開酒店，然後寄存行李。

我地再次搭發財車出去外港碼頭，再轉巴士去十月初五街吃中午餐。。

貓姐唔多舒服，開始作感冒，所以唔食有藥材成份的麪，叫咗碟魷魚炒麪。。

果仁炸蝦丸，冇想中咁好食

我同棗棗各叫咗碗天麻川芎魚頭米。。

後來見到棗棗揀哂d魚脘出嚟，放係枱面唔食。。
原來佢唔食魚脘，話淨係想飲湯😑，真係大哂鬼😖~

食過美味ga午餐，我地行去夜呣街間最香買杏仁餅，再去福隆新街買手信~

買過手信，我地行榮記去食豆腐花。。

今次第一次吃，真係好滑~

行到去果欄街，諗住飲杯椰汁。。
行去平時飲開間，但冇開，就行去隔離間耀記椰子，

都係濃濃椰子汁

之後行去關前後街,果度話要打做成藝術街,好多商舖都係新開.....

有幾間裝修係幾靚,不過店d產品就吸引唔到我地買~

行行吓,見到德成押(典當業展示館), 見唔使錢,入去睇吓

地方好細,不過有兩層,可以慢慢,順便嘆吓冷氣(12月天氣都幾熱~)

9

搞搞震一輪,我地行返出議事堂附近,即刻見到好多人.....

時間雖然早,但都就6點,網上話南記好早冇位,所以我地行去食我地今晚晚餐....南記煲仔飯

                       我地叫咗黃鱔煲仔飯同排骨煲仔飯,

雖然唔覺有大驚喜,不過都唔錯,d醬油幾好味,

真係經濟又好食~

我地叫多個豬肝菜湯,好抵食~

下次冬天嚟,想試吓鷄煲~

食飽飽後,我地兩日行程就此結束~