韓國病之旅2013☆•*¨*☆第二天之二

我地衝衝忙忙咁走返地鐵站,如果搵唔番本簿,餘下ga行程都幾麻煩

我第一時間去番頭先個隔厠所搵,唔見喎

我就逐隔逐隔搵,都唔見

行出嚟,見到有個站長室,咪硬著頭皮入去問吓佢地有冇執過本黑皮簿,用簡單英文問,好在佢地都識聽……

真係好,原來真係有人執咗,攞咗嚟站長室,謝天謝地,韓國原來真係有好多好人,Gamsa-hamnida~

真係要表揚一吓,新村地鐵站

搵到本簿,又開始返我地ga行程

諗住由新村買野行街到梨大女人街…..

原來我地d團友,好多都係嚟幫人買野,尤其係肚姐,佢幫個係唔多熟ga人買野,果個人好有問題,叫人幫佢買100張面膜,潤護露,眼膜等等…..但肚姐又肯幫佢買,重要扑心扑命咁買,真係吹脹

我地瘋狂咁買野,簡直樂此不疲,但難為d男士,佢地不停係咁等…….

行到咁上下,都成十點,原本諗住去弘大食燒海鮮,但驚食飽冇地鐵返酒店,所以都係返去東大門先去食晚餐…..

我地返到酒店放低d戰利品,然後出去食晚餐~

東大門唯一好處係不夜城,好多食店都開好夜,而我就揀咗姜虎東烤肉,里間野24小時營業,加上我有coupon,所以就go go go~

叫咗兩個摇摇便當,因為見到網上面d人推介~

其實都係好簡單ga餸

合埋個便當,大力搖,

打開就食得,都唔錯,都幾好食….

頭一輪,佢地會免費咁放d蛋俾我地,倒係旁邊,聽聞第二次叫就要錢,不過我地冇再叫…

佢地d餐份量唔多,所以叫咗兩個,尤其d牛肉,少得可憐,不過其實唔貴~

講真味道都唔差~不過我上次同棗棗去惠化間烤肉店,全程都有人幫我地燒同剪,好好招呼,連中午個間立食韓牛都有人幫你燒同剪~
里度唔係唔好,職員都ok,不過要自己剪同燒~

不過食飽里餐後,有人同我講想再去新村間立食韓牛,我話唔就腳去唔到,要去自己諗辦法(而家知道係好野哩,今朝重係度抱怨)

食飽飽都成十二點,我地返酒店休息,不過我喉嚨開始痛